Burime diplomatike të Bashkimit Evropian bëjnë të ditur, se nuk pritet të merret vendim mbi kuadrin negociues me Maqedoninë e Veriut dhe Shqipërinë nesër gjatë takimit të Ministrave të Çështjeve Evropiane të Bashkimit Evropian. Kjo pasi aktualisht nuk ka sinjale nga Bullgaria dhe as nga Maqedonia e Veriut lidhur me një ndryshim të qëndrimit të tyre mbi Marrëveshjen e Fqinjësisë.

Për kuadrin negociues për Shqipërinë nuk ka kundërshtime, por këto kuadra negociuese nuk mund të aprovohen pa unanimitet në gjirin e shteteve anëtare. Unanimiteti nuk është i mundur të arrihet, duke qenë se Bullgaria kërkon që të përfshijë në kuadrin negociues me Maqedoninë e Veriut një udhërrëfyes për zgjidhjen e çështjes historike dhe të gjuhës gjatë negociatave të anëtarësimit me Maqedoninë e Veriut.

Burimet diplomatike evropiane kanë sqaruar, se Ministrat e çështjeve evropiane mblidhen nesër në video konferencë, gjë që e bën shumë të vështirë marrjen e një vendimi. Nëse do ketë ndryshim të qëndrimeve të Bullgarisë dhe Maqedonisë së Veriut, vendimi për kuadrin negociues me të dyja vendet mund të merret përmes procedurës me shkrim. Por deri tani, sipas burimeve diplomatike, ka pak gjasa që kjo të ndodhë para fundit te vitit.

Duke u përgjigjur pyetjes, nëse për Shqipërinë drafti i konkluzioneve do t’i referohet 2 kushteve që mbeten për t’u përmbushur nga Shqipëria sipas Komisionit Evropian apo mund të ndryshojë sipas kërkesave të 5 shteteve anëtare mbi një kushtëzim më të rreptë për Shqipërinë, burimet diplomatike janë përgjigjur:

“Nuk pritet të ketë një diskutim të gjatë mbi kushtëzimin për Shqipërinë. Konferenca e parë ndërqeveritare me Shqipërinë do të mblidhet vetëm kur të jenë përmbushur kushtet”.

Kjo bën të kuptohet, se drafti i konkluzioneve për Shqipërinë mund të mbetet në formën e kushtëzimit me dy kushte lidhur me funksionimin e plotë të Gjykatës Kushtetuese dhe të Lartë dhe ndryshimin e ligjit për mediat sipas rekomandimeve të Komisionit të Venecias.

/Klan/

Leave your vote

Comments

0 comments

LEAVE A REPLY

Please enter your comment!
Please enter your name here