KEDS-i dhe Komuna e Pejës kanë bashkuar forcat të mërkurën që të investojnë mbi 2 milionë euro në rrjetin elektrik të Rugovës. Kjo është arritur pas marrëveshjes që nënshkruan kryeshefi ekzekutiv i KEDS-it,  Alper Erbas dhe kryetari i Pejës, Gazmend Muhaxheri.
“I tërë rrjeti do të zëvendësohet me rrjetin e ri duke përfshirë të gjitha fshatrat e kësaj treve. Pra, 89 kilometra do të jenë linjë komplet e re, pjesa më e madhe nëntokësore. Pra, shërbimet për këtë pjesë do të jenë shumë më kualitative”, tha Erbas.

Sipas komunikatës, KEDS kishte trashëguar një rrjet të vjetëruar në atë pjesë, por tashmë gjithçka do të jetë e tejkaluar.
“KEDS po investon në mënyrë të vazhdueshme anekënd vendit dhe ky është një lajm i mirë për qytetarët. Investimi në Rugovë është jetik edhe për zhvillimin e turizmit në rajonin e Rugovës, që ndikon direkt edhe në zhvillim ekonomik”, tha Muhaxheri.
Projekti do të fillojë menjëherë dhe parashihet të kryhet në periudhën më të shkurtër të mundshme.
“Kjo linjë do të ketë edhe mundësinë e dyfishimit të kapaciteteve, duke e zgjidhë çështjen e furnizimit me energji elektrike të kësaj treve turistike të Kosovës për një kohë të gjatë. Problematike gjithashtu ka qenë kalimi i linjave ajrore në terrene të vështira dhe me drunjë, degët e të cilëve vazhdimisht binin mbi tela duke shkaktuar prishje të shpeshta. Tashmë, pjesa më e madhe do të jetë buzë rrugës dhe me kabllo nëntokësore në pjesën më të madhe, duke i eliminuar përgjithmonë defektet e tilla apo intervenimet e mundimshme. Por, ky nuk do të jetë investimi i vetëm që KEDS ka paraparë për Rajonin e Dukagjinit. Në tri qytetet e saj, përkatësisht në Pejë, Gjakovë dhe Istog do të vendosën linjat e Tensionit të Mesëm nën tokë dhe do të dyfishohen kapacitetet nga 10 në 20 kilovolt, njëjtë siç po veprohet në Prishtinë”, bën të ditur KEDS.
Tutje në njoftim thuhet se “Ky investim do të bëjë që kushtet atmosferike, sidomos erërat e fuqishme që godasin më së tepërmi këtë pjesë të vendit, të kenë ndikime minimale në furnizimin me energji elektrike, sikurse të tejkalohen mbingarkesat dhe të krijohen linja alternative për konsumatorë”.

Leave your vote

Comments

0 comments

LEAVE A REPLY

Please enter your comment!
Please enter your name here